مجلة مملكة الحب ///بقلم اسماعيل هريدي
أنا الصعيدي
الفلاح أبو عِمه
وجلبيه أربع أمتار
وشال كشمير مضفور
أوعاك تقولي
..... قاضي
أنا قاضي قبل ما تتولد
وتقف في مدرستك طابور
فصيح
من أيام الحكيم آني
قاضي
من زمن حتحور
وقبل ما تدخل محكمه
ويبقالك
ديدبنات وحجاب
وكرسي
بيلف ويدور
أنا اللي عمره ما أستنى
علاوه
في قرار وزاري ولامنشور
أما أنت يا حلاوه عليك
يا حلاوه
لو فاتك في العلاوه
الدور
الأسبوع عندك
خمس أيام وبس
من غير ليالي
وأنا السبوع عندي
سبع أيام وكسور
أربع شهور في السنه
عندك
.... بكنس
وأنا إتناشر 12 شهر
شقيان مبنامش
أزرعلك الدنيا سنابل قمح
وبساتين ورد وزهور
أنا الصعيدي
الفلاح أبو عمه
وجلبيه أربع أمتار
وشال كشمير مضفور
أوعاك تقولي
.... دكتور
أنا طبيب جهلك
اللي ياما جبلك
كتب وأقلام
وكراسات
فيها مربعات وسطور
ولا نسيت يا منصور !!
أوعاك تقولي ...
مهندس
وتتباهى يا مغرور
أنا من غير مدرسه
ولا مدرس
هندستلك دنيتك
وشقِيتلك
في توب الضلام
النور
أنا اللي قدتلك
صوابعي العشره
شمع
لا مني خلصوا
ولا طفاني الدمع
ولا خليتك ليله
نمت مكسور
مفهوم يا.... منصور
أوعاك تقولي ضابط
بدبورتين.. ونسر بجناح
وعلى جنبك
سلاح ميري
وموقفينك في إشارة مروور
أنا زيك شايل سلاح
بس سلاحي فاسي
تشق الأرض
تطرح خير
ويرويها عودي
والطنبور
وإن كان عل الدبابير
متهزنيش
ولا أخافش منها
على آخر الزمان
هخاف من دبور !!!
عيب يا منصور
وإن كان عل الجناح
أنا بادرها
أسراب حمام
علي غيطاني
تحوم وتدوور
مفهوم يا منصور....
وصايا جدك
وجد جدك
السابع....
والخمسين
لسه في وداني
وكلامه في دماغي
محفور
دي تعيب
ودي توجع
ودي تضر
ودي تنفع
مش مدرس يقولك كلمتين
تكتبهم في كراسك
أوسطرين
وتهز راسك وترجع يا غندور
عرفت أنا مين.....
يا منصور
أنا أبوك
الصعيدي
الفلاح أبو عمه
وجلبيه أربع أمتار
وشال كشمير مضفور
* بكنس بمعنى عطله أو أجازه
بلهجة الصعيد
تسلموا....
إسماعيل هريدي
تعليقات
إرسال تعليق